NGEROMPAK ENGGAU NGEROMPAK BEBALA MAIOH

ROMPAK

SEKSYN 390 KANUN KESEKSAAN

(1)Rompak reti nya ngereja pengawa menchuri enggau mejal.
(2)Penyalah “Menchuri nyadi Rompak”, enti niat tauka tuju ati ti ka ngereja penyalah menchuri nya, tauka ka naban, tauka naban ka reta tengkira ti udah di olih ka ngena jalai nya, orang ti ngereja penyalah nya tauka enggau sengaja ngenatai ka tauka nguji ngenatai ka ngagai orang ti di curi iya utai nya sampai ka mati, tauka bakal, tauka ngurong orang nya ngena jalai ti salah serta ngenakut ka orang nya sampai ka iya ka di bunoh tekala nya, tauka ngurong ngena jalai ti salah orang ti di curi reta tengkira nya maia ti ngenchuri reta sida iya.
(3)Penyalah “Mejal nyadi Rompak”, enti orang ti ngereja penyalah mejal nya bisi ba mua orang ti di emba tauka ditakut ke iya maia iya ngereja penyalah mejal nya, iya nya orang ti di pejal nya tauka orang bukai ka dibunoh maia nya, tauka ka di bakal ka maia nya, tauka ka di kurong maia nya, lalu ketegal ti baka nya iya ngenakut ka orang ti di pejal nya ambi ka orang nya ka nyerah ka utai ti di pinta iya ngena jalai pejal ti salah nya.

PENERANG

Orang ti ngereja penyalah nya semak tauka ngimbai orang bukai ti chukup semak ari iya ti tau sampai ka orang nya ka di bunoh, tauka ka di bakal ka, tauka ka di kurong ngena jalai ti salah.

SEMPAMA

(a)A megai Z lalu enggau chara nipu ngambi duit Z enggau barang emas dalam gari Z, lalu ukai ari pemendar Z. Ba utai ke baka tu A udah ngereja penyalah menchuri, lalu enggau tegal ti ka ngereja penyalah menchuri nya A lalu enggau sengaja ngempang Z enggau jalai ti salah. Nyadi ke tegal nya A di kumbai udah ngereja penyalah ngerompak.

(b)A betemu enggau Z ba jalai alun, lalu nuchul ka pistol sereta minta duit ari Z. Ketegal nya Z lalu nyerah ka duit iya ngagai A. Ba utai ke baka tu A udah di kumbai ngereja penyalah mejal minta duit nya ari Z laban udah ngenakut ka Z enti sema iya enda meri duit nya iya ka di kemedis ka tekala nya leboh A ti mejal iya nya. Nyadi ketegal utai baka tu A udah di kumbai ngerompak.

(c)A betemu enggau Z seduai anak Z ba jalai alun. A lalu ngambi anak Z lalu madah ka diri ka muai anak Z nya ngagai lebak ti dalam enti Z enggai meri iya duit. Nyadi Z lalu meri duit iya ngagai A. Ba utai ke baka tu A udah ngereja penyalah mejal ketegal ti minta duit ari Z laban ti ngenakut ka Z enti sema enda meri duit anak Z ka dibuai ngagai lebak ti dalam laban Z takut ke anak iya ti enggau iya dia ka di kemedis ka olih A tekala nya. Nyadi ba utai ke nyadi baka tu A udah ngereja penyalah ngerompak.

(d)A bolih reta ari Z ketegal ti madah ngagai Z, “Anak nuan udah di tan ka bala kami, lalu ka di bunoh enti nuan enda meri kami duit sepuluh ribu ringgit.” Nyadi utai ke baka tu iya nya mejal lalu tau di kira nitih ke genteran mejal tang enggai nyadi di kumbai ngerompak. Lalu enti sema Z berasai takut lalu ngumbai bala sida A nya amat ka munoh anak iya tekala nya nya baru tau di kumbai ngerompak.