NIPU

SEKSYN 415 – KANUN KESEKSAAN
Sebarang orang ti bisi ditemu ngumbok tauka ngena chara ngumbok ti ngepun ka :

( a ) Ngena chara nipu tauka ngumbok ngena chara ti enda beradat sampai ka orang nya nyerah ka sebarang reta ngagai sebarang orang , tauka ngambi ka orang nya ka naroh reta nya ; tauka

( b ) Bisi niat ka ngumbok orang nya ngambi ka iya ka ngereja, tauka ka ngereja pengawa ti enda patut dikerja iya enti ukai ketegal ari diumbok lalu ketegal ti ngereja pengawa nya, orang nya ka bisi pengerugi tauka ngemakal ka tubuh, pengingat, pemujor pendiau ngidup kediri tauka reta tengkira ngagai orang bukai.

Lalu ketegal pengawa dua iti nya orang tu ka di kumbai ngereja penyalah “NIPU”.

Penerang Keterubah – Ngelalai ka penerang enggau tuju ti salah ti ngenatai ka penyaru runding dalam reti ba seksyn tu.

Penerang Kedua – Semata mata mungkir sempekat ba kontrak enggai nyadi ke tanda bisi niat asal ka Nipu.

Penerang Ketiga – Sebarang orang ti bisi pengari lalu orang nya nyadi ke ejen, tauka iya empu ka dikumbai ngereja pengawa ngari kediri empu.

Sempama
( a ) A bebula madah kediri kerja ba opis perintah lalu sengaja ngemula ka Z, lalu ketegal nya Z lalu ngarap ka A nya amat kerja ba opis perintah lalu ngujong ka Z ngemendar ka A ngambi barang ngena chara berutang alai A ti endang nadai niat ka mayar barang ti diambi iya nya, lalu A ka dikumbai kitai Nipu.

( b ) A muai tanda barang ti enda benama lalu nyilih iya ngena tanda barang ti benama serta berega agi ambi ka Z meli barang nya lalu ngarap ke barang nya ti utai benama serta tulin, nyadi ba utai ke baka tu A udah Nipu Z.

( c ) A ngayan ngagai Z siti bansa barang ti tiru ngambi ka Z ngarap ka barang nya utai ti tulin lalu mega Z ngarap ke barang ti dijual A ngagai iya nya sebaka enggau ti di ayan ke iya ngagai Z , ambi ka Z meli serta mayar rega barang nya nitih ka rega barang nya ti bendar, nyadi A udah Nipu Z.

( d ) A udah mayar barang ngena siti bil ti dituju ka ngagai gerempong dagang, alai A ti nadai kaul enggau gerempong nya serta mega nadai kaul ba belanja enggau gerempong nya, lalu A sengaja ngambi ka Z nyual barang nya ngagai iya ti endang nadai niat ka mayar barang nya , alai A ka dikumbai Nipu.

( e ) A bechagar ka intan ti endang di temu iya ukai intan ti tulin ngambi ka Z ka nyali iya duit, lalu A ka dikumbai kitai Nipu Z.

( f ) A ngumbok Z ngambi ka ngarap ka A tu ka mayar duit ti dijali Z ngagai iya, tang A endang nadai niat ka mayar duit ti diinjau nya baru, lalu A ka dikumbai Nipu.

( g ) A madah kediri ka nyerah ngagai Z lada chelum ti di kemisi ka iya ngambi ka Z ka nyali duit ti bechengkeram ka lada chelum nya. Laban Z sigi ngarap ka A nya amat ka nyerah ka lada chelum iya nya ngagai iya, tang udah A bolih duit ari Z dia A lalu enggai agi nyerah ka lada chelum nya ngagai Z nitih ka sempekat seduai iya nya tadi. Nyadi A enggai nyadi dikumbai Nipu laban iya bebula ka sempekat seduai Z nya, lalu kes ke baka tu ka di saman ngena lawyer nyadi ke kes sivil. Tang enti A endang nadai ati ka nyerah ka lada chelum nya ngagai Z iya ka dikumbai kitai Nipu.

( h ) A ngumbok Z ngambi ka Z ngarap ka A udah mayar bagi iya ( A ) ba siti kontrak ti digaga seduai Z, ti endang lalu bedau dibayar A ngambi ka Z mayar duit nya, A ka dikumbai Nipu.

( i ) A nyual lalu nukar nama orang ti beempu tanah nya ngagai B. A ti endang nemu diri nadai agi kuasa ba tanah nya lalu nyual tanah nya baru ngagai Z, tauka ngadai tanah nya ngagai Z, lalu nadai madah ka tanah nya kala udah di jual serta di tukar iya nama dulu suba ngagai B, lalu udah iya nerima duit gadai tauka rega tanah nya ari Z. Nyadi A udah nipu Z.

( j ) A bemain ngena dadu ti tiru tauka daun terup ti udah bisi di tanda iya lalu menang duit judi nya. Lalu A ka dikumbai Nipu.