NYERUNGKAI RUMAH (PECAH RUMAH)

SEKSYEN 445 KANUN KESEKSAAN

Orang ti tama rumah enda beradat ka dikumbai nyerungkai rumah, enti iya masuk ke dalam rumah nya nitih ke enam iti chara ti di sebut di baroh ditu :-

(a) Enti iya tama tauka pansut ari siti lubang ti digaga iya empu tauka digaga orang bukai ti sama enggau iya tama rumah enda beradat, ketegal ti ka tama rumah nya enda beradat;

(b) Enti iya tama tauka pansut ari sebarang lubang ti endang udah bisi dia dulu agi ari nya, tauka endang udah bisi digaga ambi ke bisi alai mensia tau tama, tauka meragau, tauka ulih niki dinding tauka rumah nya;

(c) Enti iya tama tauka pansut ari lubang ti digaga iya empu tauka orang bukai ti sama enggau iya tama rumah nya enda beradat, tauka sebarang chara ti enda patut ba ati orang ti beempu tauka diau ba rumah nya di buka tauka di tebok, tauka dikeruang;

(d) Enti iya muka sebarang kunchi pintu rumah nya udah iya ti tama rumah nya enda beradat, ketegal iya ti ka pansut ari rumah nya udah bekau iya ti tama rumah nya enggau enda beradat;

(e) Enti iya olih tama tauka pansut ngena chara mejal orang, tauka ngena chara nyerang orang, tauka ngenakut ka orang madah kediri ka nyerang orang bukai ke diau dia;

(f) Enti iya tama tauka pansut ari sebarang lubang ti udah ditutup, tauka dikunchi ambi ka orang bukai nadai tau tama tauka pansut nengah lubang nya, ti udah dibuka iya tauka orang bukai ti enggau iya tama rumah nya enggau enda beradat.

PENERANG

Sebuah rumah ti nangkir tauka betampung perabung enggau sebuah rumah bukai, ti alai diau ba rumah nya lalu ba antara rumah nya bisi alai iya betampung perabung ka di kumbai kitai sebuah rumah nitih ke undang undang tu.

SEMPAMA

(a) A tama rumah enda beradat ngena chara nebok dinding rumah Z ambi ke dinding rumah nya belubang, A lalu nama ke jari tauka lengan iya nengah lubang nya, tu ka dikumbai kitai nyerungkai rumah;

(b) A tama rumah enda beradat ngena chara meragau tama ke dalam sebuah kapal nengah jendela ke ba antara ringkat kapal nya, taja pan jendela nya tebuka, tu ka di kumbai kitai nyerungkai rumah;

(c) A tama rumah Z enggau enda beradat nengah siti jendela ti tebuka. Tu dikumbai kitai nyerungkai rumah;

(d) A tama rumah Z enggau enda beradat nengah pintu rumah nya, udah iya ti olih tama muka siti ari pintu rumah nya. Tu dikumbai kitai nyerungkai rumah;

(e) A tama rumah Z enggau enda beradat nengah pintu rumah nya udah iya ti ulih muka kunchi pintu rumah nya ngena chara nyulok dawai ba lubang kunchi pintu nya. Tu di kumbai nyerungkai rumah;

(f) A tetemu ka kunchi rumah Z ti endang udah lenyau lalu tama ngagai rumah Z udah iya ti muka pintu rumah nya. Tu dikumbai nyerungkai rumah;

(g) Z bediri ba mua pintu rumah iya, A datai lalu nempoh Z sampai ke Z nyau tesungkor tauka laboh, A lalu tama ngagai rumah Z enda beradat. Tu dikumbai nyerungkai rumah;

(h) Z kerja nyadi jaga pintu ba rumah Y, lalu bisi bediri serta jaga dia, A datai lalu tama rumah nya enda beradat udah iya ti ngenakut ke Z ari ti nagang iya tama serta A lalu madah kediri ka nyamah Z. Tu di kumbai nyerungkai rumah.